Қарағандыда бір топ жігіттің 16 жасар қызды зорлап, бейнежазбаға түсіргені белгілі болды

Қарағандының бес тұрғыны 16 жастағы қызды зорлап, бейнежазбаға түсірді деген күдікке ілінді. Оқиға туралы жәбірленушінің ата-анасы туыстарынан естіген. Orda.kz тілшісі жәбірленушінің әкесінен мән-жайды біліп қайтты.

Қыздың әкесі өз атын жария етпеуді сұрады. Ер адамның айтуынша, оқиға 2025 жылдың 14 ақпанында болған. Қыздың ата-анасы сапарда болған кезде, қызды құрбысы түнгі клубқа шақырған.

Одан кейінгі болған жайттар жәбірленушінің есінде жоқ. Келесі күні ол бөтен пәтерде, бес жігіттің арасында есін жиған. Құрбысы да сол жерде болған. Ата-анасы қыздарының «сусынына бірдеңе араластырған» деп күдіктенеді.

«Қызым есеңгіреп қалды, бізге ештеңе айтпады. Бірақ біз оның сол күннен бастап өзгеріп кеткенін байқадық. Күлмейді, үнсіз жүреді, үнемі мазасызданады. Тек 25 ақпанда ғана туыстарымыздан қызымның бейнежазбасы тарап кеткенін естідік! Онда бес жігіт оған қалағанын істеп жатыр. Ол есінен танып жатқан, тіпті қарсыласуға да шамасы келмеген. Оны зорлап қана қоймай, бәрін бейнежазбаға түсіріп алған болып шықты. Содан кейін құрбы-құрдастарына таратып жіберген», — деп әңгімеледі ер адам. 

Ата-анасы сұрастыра бастағанда, қыз болған оқиғаны анық есіне түсіре алмайтынын мойындады. Ол есін жиғанда, бәрі бұлыңғыр елес қана болған.

«Оған: «Егер оқиғаны біреуге айтсаң, бейнежазбаңды ата-анаңа жібереміз» деп қорқытқан. Сондықтан қыз үндемей жүрген. Қыз зорлағандардың бірі өзінің прокуратура мен ҰҚК-де туыстары бар екенін айтып қорқытқан. «Егер мені ұстап алса да, тек бірнеше айға қамайды, шағымданудың қажеті жоқ» деген. Біз бұл нұсқаны полицияның тексеруін талап етеміз», – дейді жәбірленушінің әкесі.

Арада үш айдан астам уақыт өтсе де, іс алға баспай, ұзаққа созылып кетті. Жәбірленушінің әкесі үш жігіттің ғана қамауға алынғанына наразы. Қалғандары бостандықта жүр. Ал сол құрбысы – оқиғаның басты куәгері ғана ретінде тергеліп жатыр. Бірақ жәбірленушінің әкесі оны сыбайлас ретінде жауапқа тарту керек деп санайды.

 Orda.kz тілшісі түсініктеме алу үшін полицияға жүгінді. 

«Полиция қызметкерлері үш күдіктіні анықтап, ұстады. Оларға қатысты қамауда ұстау түріндегі бұлтартпау шарасы тағайындалды. Басқа қатысушыларға қатысты тергеу әрекеттері жалғасып, іс жан-жақты және мұқият тергеліп жатыр. Қажетті сараптамалардың толық кешені тағайындалды. Оның нәтижелері бойынша қылмыстық іс сотқа жолданады. Тергеу барысы Қарағанды облысы ПД басшылығының ерекше бақылауында. Тергеу мүддесіне байланысты басқа ақпарат жария етілмейді»,  деп мәлімдеді полиция.

Қыздың әкесінің айтуынша, қызына психологиялық көмек қажет болған. Қыз сол оқиғадан кейін әлі күнге дейін өз-өзіне келе алмай жүр. Әкесі кінәлілердің бәрінің жазаланғанын талап етіп отыр.