Қарағандыда әйел автобус аялдамасында босанды

Қарағандыда әйел адам автобус аялдамасында босанды, деп хабарлайды Orda.kz.

Куәгерлердің айтуынша, толғақ кенеттен басталған. Жүкті әйелдің суы кетіп, жатыр мойны тез ашылғандықтан, ол перзентханаға дейін жете алмаған.

Жедел жәрдем жылдам жеткен. Медициналық қызметкерлер босанған әйел мен сәбиді дереу облыстық перинаталдық орталыққа жеткізді.

«Көрсетілген медициналық көмек нәтижесінде босанған әйел мен жаңа туған сәби Қарағанды облыстық клиникалық ауруханасының перинаталдық орталығына жеткізілді. Анасының жағдайы тұрақты. Сәби қазіргі таңда реанимация бөлімінде жатыр», – деп мәлімдеді Қарағанды облысының денсаулық сақтау басқармасы.

Жүктіліктің 34-аптасында дүниеге келген баланың жағдайы ауыр.

Еске салайық, бұған дейін Түркістан облысында 15 жастағы мектеп оқушысы 23 жастағы әскери қызметкерден жүкті болып, босанғаны хабарланған.