Қарағанды облысында зейнеткердің 11 миллион теңгеден астам ақшасын ұрлап кетті

Теміртау қаласының екі тұрғыны 77 жастағы зейнеткердің 11 миллион теңгесін ұрлап кеткен.

62 және 70 жастағы екі әйел 77 жастағы зейнеткерге көмектесіп пәтерін тазалап, оған тамақ әзірлеп, азық-түлік сатып алатын. Көбінесе ер адам оларға керекті заттар үшін өзінің банк картасын беретін.

Бір кезде зейнеткердің шотынан 11 миллион теңгесі жоғалып, полицияға хабарласқан.

Тәртіп сақшылары ұрлықты жәбірленуші жақсы білетін адам жасаған болуы мүмкін деген болжам жасады. Күдіктілердің арасында екі егде әйел болды.

Олар қамауға алынды. Әйелдер қылмысты мойындады. ҚР Қылмыстық кодексінің 190-бабы «Алаяқтық» бойынша сотқа дейінгі тергеу амалдары жүргізілуде.