Қарағанды облысында төтенше жағдай жарияланды

Қарағанды облысы Шет ауданында төтенше жағдай жарияланды. Ауданда электр қуатын беруге шектеу қойылды, деп хабарлайды Orda.kz. 

Бұл туралы Қарағанды облысы әкімдігінің баспасөз қызметі мәлімдеді.

Мәліметтерге сүйенсек, ауданды электр энергиясымен қамтамасыз етіп отырған «Шет-Энерго» компаниясы «Жезқазған электр тарату желісі» компаниясының электр энергиясын беру жөніндегі талаптарын орындамаған көрінеді. Нәтижесінде ауданда электр қуатын беруге шектеу қойылған. «Шет-Энерго» көп жыл бойы электр желілерін жаңғыртуға қаражат салмағаны айтылды. Бұл энергиямен жабдықтауда жүйелі мәселелер туындатқан. 

Тұрғындар жарықтың жиі өшірілуінен зардап шегеді. Жылусыз да қалады екен. Тұрақты ескертулерге қарамастан «Шет-Энерго» қызметінің сапасы жақсармаған. Әкімдік жағдайды қалпына келтіру үшін жергілікті ауқымдағы төтенше жағдай режимін жариялады.

Жергілікті билік өкілдерінің айтуынша, бұл қадам энергиямен жабдықтау саласында тәртіп орнатуға, сапалы қызметті қамтамасыз етуге бағытталған.