Қарағанды-Балқаш тас жолындағы жол апатынан екі адам ажал құшты

Түнде Қарағанды облысы, Қарағанды-Балқаш тас жолында көлік апатынан 2 адам қаза тауып, 6 адам жарақат алды. 

 Бұл туралы ekaraganda.kz хабарлады 

Оқиға сағат 00.30-да Абай ауданы Спасск ауылынан 2 шақырым жерде болды. Газель Hyundai Elantra көлігімен соқтығысып, екі көлік те шұңқырға түсіп кеткен. Hyundai көлігінің 32 жастағы жүргізушісі мен жолаушысы оқиға орнында көз жұмды. Жеңіл көліктің үш жолаушысы, сондай-ақ екі жолаушы мен «Газельдің» 35 жастағы жүргізушісі дене жарақатымен ауруханаға жеткізілді.

«Бұл факті бойынша қылмыстық іс қозғалды. Тиісті сараптамалар тағайындалды. Полиция департаменті жүргізушілерді сақ болып, жол қозғалысы ережелерін қатаң сақтауға шақырады» деп мәлімдеді Қарағанды ​​облысының полиция департаменті.