Қаныш Сәтпаевтің 125 жылдығына орай пойыз іске қосылды

Астана қаласындағы Нұрлы жол бекетінен Қаныш Сәтпаевтің 125 жылдығына орай безендірілген жолаушылар пойызы жолға шықты.

Бұл туралы «Қазақстан темір жолы» баспасөз қызметі хабарлады.

Енді жаңа пойыз №65/66 «Астана-Жезқазған» бағыты бойынша жүреді. Пойыздың сыртқы бөлігінде ғалымның өмір сүрген жылы мен мерейтойлық портреті бейнеленді. «Қазақстан теміржолы» мен «Қазақмыс» компаниясы бірлесіп жүзеге асырған бұл шара алғаш рет кең ауқымда қазақтың көрнекті тұлғаларын ұлықтауға арналған жоба болып отыр.

Жобаның негізгі мақсаты — ұлы ғалымның есімін мәңгі есте сақтау және оның ғылыми жетістіктеріне назар аудару болды.

Қаныш Сәтпаев Қазақстан Ғылым Академиясының тұңғыш президенті болған. Оның басшылығымен өткен ғасырдың 40-шы жылдары Қазақстанда Жезді марганец рудаларының кен орны ашылып, іске қосылды. Қаныш Сәтпаев Қазақстанның экономикасына зор үлес қосып, мыс, көмір және басқа да пайдалы қазбалардың кен орындарын ашқан, қазақ ғылымына өлшеусіз үлес қосқан ғалым.