Қаңтар оқиғасынан кейін жұмыстан кеткен Мамин құрған сараптау кеңесі таратылды

Қазақстанда 2021 жылы Асқар Мамин премьер-министр болып тұрған кезде құрған талдау кеңесі таратылды, деп хабарлайды Orda.kz.

«Қазақстан Республикасының Еуразиялық экономикалық одаққа қатысуы бойынша талдамалық кеңес құру туралы» Қазақстан Республикасы Премьер-Министрінің 2021 жылғы 15 қазандағы № 169-ө өкімімен құрылған Қазақстан Республикасының Еуразиялық экономикалық одаққа қатысуы жөніндегі сараптамалық кеңесі таратылсын» деп жазылған Премьер-Министр Олжас Бектеновтің 22 қаңтардағы өкімінде.

Мамин 2019 жылдың ақпанынан 2022 жылдың 5 қаңтарына дейін елімізде премьер-министр болды. Ол қаңтар оқиғасына байланысты министрлер кабинетінің басшысы қызметінен босатылды.

Ал таратылған кеңес құрудағы ресми мақсат — Қазақстанның Еуразиялық экономикалық одақта еліміздің ұлттық экономикалық мүдделерін белсенді түрде қорғау және ілгерілету болатын.

ЕАЭО-дағы Қазақстанның «мүдделерін қорғау» төңірегінде қалыптасқан жағдайды, әсіресе, Мәжіліс депутаты Ермұрат Бәпидің бұған дейін айтқан уәждеріне байланысты өткір сынды ескерсек, таратылған кеңес өз мақсатына жете алмады деп айтуға болады.