Қанша ай өтсе де Шерзат Болаттың үйін өртегендер әлі табылмады

Талғарда кісі қолынан қаза тапқан Шерзат Болаттың өлімі елімізде резонанс алған істердің бірі. Артынан ол тұрған үйді белгісіз біреулердің өртеп кетуі де көпшлікті бей-жай қалдырмады. Бүгін Бас прокурордың орынбасары Әсет Шындәлиев үйді өртегендер әлі табылмағанын айтты, деп хабарлайды Orda.kz.

Бүгін Шындәлиев Шерзат Болатқа қатысты істің прокуратура органдарына тексеру, айыптау актісін жасау үшін берілгенін айтты. Сонымен қатар, журналистер оның үйін өртегендер анықталды ма деп сұрады. Бас прокурор орынбасарының мәліметінше, әзірге оның қолында нақты ақпарат жоқ.

«Тергеу жалғасып жатыр. Алдын ала тергеудің қандай нәтижелерге әкелетінін қазір айта алмаймын. Бірақ қандай да бір ақпарат пайда болған кезде, қоғамға хабарланады деп ойлаймын. Әзірге жоқ (Шерзаттың үйін өртеді деген күдікті табылған жоқ – ред). Менде ондай ақпарат жоқ», – деп қысқаша қайырды Шындәлиев.