Канье Уэсттің концерті 15 тамызға ауыстырылды

Концерт басталғанға дейін бірнеше сағат бұрын Алматының Орталық стадионына жинала бастаған көрермендер бірнеше сағат бойы нөсер жаңбыр мен қатты желдің астында өз кумирін күтті, деп хабарлайды Orda.kz.

Ұйымдастырушылар концерттің ауыстырылғанын сахнадан хабарлады.

«Кешірім сұраймыз, бүгінгі шоуды ертең, дәл осы уақытқа ауыстыруға мәжбүрміз. Барлық билеттеріңіз сол сілтемелер арқылы қолжетімді болады. Түсіністікпен қарауларыңызды сұраймыз. Қауіпсіздік бәрінен маңызды», – деді ұйымдастырушылар.

Рэпердің өзі де әлеуметтік желідегі парақшаларында концерттің кейінге шегерілгенін растады.

Алайда көрермендер наразылық білдіруде. Олардың арасында концертке басқа елдер мен қалалардан арнайы келгендер көп. Олардың кейбірі ертең Алматыдан кетуі керек. Сондай-ақ кей көрермендердің ертеңге басқа жоспарлары болған.

Болмай қалған концертке келгендер байланыс пен интернеттің нашарлығына да шағымдануда. Стадион маңынан такси шақыру мүмкін болмағандықтан, адамдар үйлеріне жаяу қайтып бара жатыр.