Қанды қаңтар: Азаптап өлтірген полицейдің үкімін сот жұмсартпады

Семей қаласының №2 соты 11 ақпан күні Қаңтар оқиғасынан кейін уақытша ұстау изоляторында азаптағаннан қаза болған Жасұлан Анафияевтің ісіне қатысты сотталған бұрынғы полицей Арнат Мирадиловтің жазасын жеңілдету туралы мәселені қарады, деп хабарлайды Orda.kz.

Orda.kz тілшісі құқық қорғаушы Ринат Рафхатқа хабарласып, осы мәселе жайлы сұрастырды. Құқық қорғаушы сот айыптының үкімін жұмсартпағанын мәлімдеді.

«Мирадилов не бары 5 жылға сотталған еді. Қалған мерзімін жеңіл жазаға ауыстыруға шағым түсірген, онымен судья қанағаттандырмады»,  деп мәлімдеді Ринат Рафхат тілшімізге.

Марқұмның әпкесі әрі заңды өкілі Ләззат Анафияеваға сот отырысы өтетіні туралы хабарлама келіп түскен. Ол осыған дейінгі алты айға созылған сот процесінде әділдікті талап етіп, бақылаушы ретінде қатысқан.

Еске салайық, 2023 жылғы 7 маусымда Жасұлан Анафияевтің өліміне кінәлі деп танылған жеті полицейге сот үкімі шыққан болатын. Олардың ішінде Арнат Мирадилов 5 жылға бас бостандығынан айырылған.