«Қамшы Көлбаевты қаржыландырды»: Қырғызстан қазақстандық кәсіпкерге іздеу салды

Forbes Kazakhstan рейтингіне іліккен қазақстандық бизнесмен Владимир Жұманбаевқа  Қырғызстанда ұйымдасқан қылмыстық топ басшысы Камшы Көлбаевтың қаржыландырғаны үшін іздеу жарияланды.

Бұл туралы kaktus.media хабарлады.

Қырғызcтан Ұлттық қауіпсіздік мемлекеттік комитеті қазақстандық бизнесмендердің бірі Владимир Жұманбаевтың арнайы операция кезінде жойылған Қамшы Асанбектің (Көлбаев) ұйымдасқан қылмыстық тобын қаржыландыру фактілерін анықтады. 

«Владимир Жұманбаев Қырғыз Республикасы аумағында алтын өндірумен, кендер мен бағалы металдарды байытумен айналысатын «В.Г.К.» жауапкершілігі шектеулі серіктестігінің иесі бола отырып, 2021-2023 жылдар аралығында жауапты тұлғаларға тапсырма берген, компания қызметкерлері халықаралық «Brotherly Circle» қылмыстық тобына кірген Көлбаевқа ай сайын 1 миллион сом аударып отырған» деп хабарлады Ұлттық қауіпсіздік комитеті.

Атап өтілгендей, сотқа дейінгі іс жүргізу шеңберінде компанияның қызметіндегі кірістің нақты көрсеткіштерін жасыру мақсатында алтын кенін өндіру туралы жалған мәліметтер мен Қырғызстанның мемлекеттік органдарына есеп беру деректерін енгізу фактілері анықталды. «В.Г.К.» жауапкершілігі шектеулі серіктестігі» республикалық бюджетке аса ірі көлемде залал келтірді.

Жиналған материалдар негізінде Бішкек қаласы Октябрь аудандық сотының шешімімен Жұманбаевқа қатысты қамауға алу түріндегі бұлтартпау шарасы сырттай тағайындалды. Ол қылмыстық қудалау мақсатында мемлекетаралық және Интерпол ҰБК арқылы іздеуге жарияланған.