Қамауда жатқан журналист – Думан Мұхамедкәрім аштық жариялады

Қонаев қаласында тәуелсіз журналист Думан Мұхаммедкәрімнің ісі бойынша сот процесі басталды, деп хабарлайды Orda.kz порталы Masa Media-ға сілтеме жасай отырып.

12 ақпанда өткен алдында ала сот тыңдауында айыптаушы прокурор процесті жабық өткізуді сұрады. Оған қорғау тарапы қарсы шығып, сот пен прокурорға сенімсіздік білдірді. Бүгінгі сот отырысында судья бұл өтінішті қанағаттандырусыз қалдырып, бөлек қаулы шығарды. Онда сот тергеуі басталмай жатып, Думан Мұхаммедкәрімді «сотталған» деп атады. Кейіннен оны «грамматикалық қателік» деп түсіндірді.

22 ақпанда болған сот отырысы даумен басталды. Сот ғимаратының алдына журналистің 40-қа жуық жақтасы жиналған. Оларға қалалық ішкі саясат бөлімінің басшысы Сағынай Мұсағитов пен Қонаев прокуроры Айдос Шорманов «жиынның заңсыз екенін» ескертіп, тарауды сұрады. Оған жиналғандар «жиынға келген жоқпыз, сотқа келдік» деп, өз қарсылықтарын білдірді. 

Думан Мұхаммедкәрімді Талдықорғаннан Қонаев сотына алып келген кезде жақтастары «Думанға бостандық!» деп ұрандатты. Сот қақпасының сыртынан видеоға түсірмек болған журналистерге полиция келіп, ғимарат ауласына жақындамау қажеттігін айтып, жолдарын бөгемек болған. БАҚ өкілдері ауланың сыртынан фото-видео түсірілім жасауға құқылы екендерін айтты.