«Кальмар ойыны» телехикаясы бала психикасына қауіп төндіре ме? – БҒМ жауабы

Білім және ғылым вице-министрі Шолпан Қарынова Орталық коммуникациялар қызметінде өткен брифингте қазақстандық балалар арасында танымал болып келе жатқан «Кальмар ойыны» баланың психикасына қауіпті ме деген сұраққа жауап берді.

Бұл туралы Orda.kz хабарлайды.

Балалар арасында кальмар ойынының танымалдығы үлкен алаңдаушылық туғызады, дейді БАҚ өкілдері. Осыған байланысты журналистер бұл телехикая туралы түсініктеме беруді сұрады.

Шолпан Қарынова бұл отандық телехикая емес екенін және оның белгілі бір шектеулері бар екенін айтты. Телехикая 18 жастан асқан ересектерге арналған.

– Бірінші кезекте бұған ата-аналар назар аударуы керек. Екіншіден, ата-ана да, мектеп те оқу іс-әрекеті шеңберінде балаларға дұрыс ақпаратты теріс ақпараттан ажырату дағдысын қалыптастыруы тиіс, мектептер осы мәселеге назар аударуы қажет. Әрине, баланың психикасы енді ғана қалыптасып жатыр, сондықтан кез келген ақпаратты мектепте де, үйде де ата-аналар бақылап отыруы керек, - деді ол.

Ол осы жылдан бастап барлық білім беру ұйымдарында балалардың сыни ойлауын, эмоционалды интеллектін дамытуға, ақпаратты ажыратуға және таңдауға, сонымен қатар дұрыс ақпаратты таңдауға арналған курс енгізілетінін айтты.

– Бұл курс осы оқу жылында жүзеге асады. Сонымен қатар, білім беру функциясы аясында мектептер бұл сериялардың шектеулеріне нақты назар аудару керектігін есте ұстауы керек, - деп түйіндеді Қарынова.