Қалған олигархтар қайтаруы тиіс активтер қайда? – Бәпи

Мәжіліс депутаты Ермұрат Бәпи мемлекетке қайтарылған активтер туралы ашық ақпарат беруге шақырды, деп хабарлайды Orda.kz.

Президент реформалары талқыланған мәжіліс отырысында депутат мемлекет басшысының заңсыз шығарылған активтерді қайтару бастамасы жайлы сөз қозғады.

«Парламент бұл заңды жедел қабылдады. Соңғы екі жылда бюджетке шамамен 2 трлн теңге қайтарылғаны туралы ақпарат та бар. Мемлекеттік органдар бұл қаражат халыққа қажетті әлеуметтік маңызы бар нысандар құрылысына жұмсалып жатқанын айтады. Алайда, осы 2 трлн теңгенің жартысын тек екі олигарх қайтарды. Ал қалған олигархтар қайтаруы тиіс активтер қайда?», – деді  Бәпи. 

Сонымен қатар, Оның айтуынша, заң қабылданғанымен, депутаттар оның орындалу барысынан хабарсыз. Сондықтан мемлекеттік органдарды атқарылған жұмыстар жөнінде ашық ақпарат беруге шақырды.