Қайтыс болған адамды өртеп, күлін жерлеу үшін жаңа талаптар қойылды

Денсаулық сақтау министрлігінің Санитарлық-эпидемиологиялық комитеті колумбарийлердің үй, мектеп, мәдени, спорт мекемелерінен кемі 50 метр қашықтықта салынуы керектігін мәлімдеді, деп хабарлайды Orda.kz. 

Елде кремация қызметіне қойылатын санитарлық-эпидемиологиялық талаптар саны артты. Жаңа талаптарға сай, крематорийлердегі пеш саны қажеттілікке қарай, яғни аза тұту рәсімдері санына, халықтың өлім-жітіміне байланысты анықталады. Сонымен қатар бір кремациялауға – бір сағат жұмсалуы керек. 

Крематорийдің құрылысына сәйкес, 1 фойесі, жуынатын бөлмелері, қосалқы үй-жайлары, аза тұту залы, шлюзі, бейімделу бөлмесі мен көлік қоятын орны болуы керек. 

Сондай-ақ ережеде колумбарийлер (қайтыс болғандардың күлі сақталатын зират) тұрғын үйлерден, емдеу, балалар, білім беру, спорттық-сауықтыру, мәдени-ағарту мекемелері, бау-бақша серіктестіктері, коттедж үйлер, халықты әлеуметтік қамсыздандыру мекемелері аумақтарынан кемінде 50 метр қашықтықта салынуы тиіс екені жазылған. 

Жаңа санитарлық талапқа сәйкес, от жағумен, яғни кремациялаумен айналысатын адамдар міндетті түрде сіреспе мен сібір жарасына қарсы екпе алуы тиіс. Сонымен қатар олар жеке қорғаныс құралдарымен – арнайы киім мен арнайы аяқ киіммен қамтамасыз етіледі.