«Қайтарылған активтер»: Сумен жабдықтау жүйесін салуға 1 млрд теңге бөлінді

Ақмола облысындағы Қосшы және Макинск қалаларында сумен жабдықтау жүйесін салуға 1 млрд теңге бөлінді, деп хабарлайды Orda.kz. 

Арнаулы мемлекеттік қор Қосшы қаласында су құбыры жүйесі құрылысын аяқтауға 476,7 млн теңге бөлді.

Ал ресми дерек бойынша бүгінде Қосшыда 50 мыңнан астам адам тіркелген. Қаланың бас жоспарына қарасақ, 2038 жылға қарай тұрғындар саны 150 мыңнан асады деп болжанып отыр.

Сонымен қатар, қайтқан қаражатқа Макинск қаласында су құбыры желілерін қайта жаңарту жұмыстары жүргізіліп жатыр. Жоба бойынша 72,7 шақырым желі тарту қарастырылған. Бұған дейін бөлінген қаражат есебінен бүгінде 45 шақырым бойынша жұмыс аяқталған. 

Арнаулы мемлекеттік қордан бөлінген 606,4 млн теңге жобаны толық аяқтауға, халықты сумен қамтамасыз етуге мүмкіндік береді.

Еске салайық, биыл үкімет қайтарылған активтерден Ұлытау өңірінде жаңа мектеп салу үшін 1,4 млрд теңгеден астам қаржы бөлді.