Қайтарылған активтер: Құлыбаевтың активі және оған қатысы бар адамдар

Қайтарылған активтерді басқаратын мемлекеттік компания «Kundybai Mining» акционерлік қоғамының 20 пайыз үлесін саудаға шығарды. Бұл үлестің бастапқы бағасы 51,38 миллион теңге деп белгіленген. 

Аукционға дайындық жүріп жатқанда Orda.kz бұл компаниямен Қазақстандағы қандай белгілі бизнесмендердің аты қатар аталғанын анықтап көрді.

«Kundybai Mining» 2011 жылы алғаш «Оңтүстік орталық» атты басқарушы компания ретінде құрылған. Бір жылдан кейін атауы «Kundybai Mining» деп өзгерген. 2018 жылдан бері компанияның негізгі қызметі — геологиялық барлау.

Бірақ лот парақшасында жарияланған 2024–2025 жылдарға арналған қаржылық есепке қарағанда, соңғы жылдары компанияның жағдайы мәз емес екені байқалады.

Осы құжаттардағы ақпаратқа қарасақ, компания акцияларының қалған 80 пайызы Kazakhstan's Mineral Resource Investment Company атты ұйымға тиесілі. Бұл компанияның үлестері бірнеше адамға әртүрлі мөлшерде бөлінген. Олардың бірі — Joint Resources холдингі. Ол холдингтің жалғыз иесі — Тимур Құлыбаев. Ал екінші құрылтайшы — «Orda Mining» ЖШС. Оның құрылтайшыларының қатарында миллионер Дінмұхамед Ыдырысов пен оның серіктесі Малғаждар Қарин көрсетілген.

Компанияның үшінші құрылтайшысы — Сәуле Мұқашова. Ол Kazakhstan's Mineral Resource Investment Company-дан бөлек, «Руханият арқылы — бейбітшілікке жету» атты қоғамдық қордың да құрылтайшысы ретінде көрсетілген. Дәл осы қор кейін Birgemiz атты басқа қоғамдық қордың құрылтайшыларының бірі болған (Перизат Қайраттың Biz Birgemiz қорымен шатастырмаңыз). Birgemiz қоры 2020 жылы пандемия кезінде дәрігерлер мен мұқтаж жандарды қолдау үшін құрылған.

Orda.kz 2022 жылы жазғандай, сол кезде қордың қамқоршылық кеңесінде мына адамдар болған:

• Алматының бұрынғы әкімі, сол кезде Nur Otan партиясы төрағасының бірінші орынбасары Бауыржан Байбек;
• сол кездегі мәжіліс депутаты, қазіргі Орталық сайлау комиссиясының төрағасы Нұрлан Әбдіров;
• белгілі хирург Юрий Пя;
• және басқа да тұлғалар.

Алайда 2022 жылы бұл қор жабылып, оның қызметі «Қазақстан халқына» қорына берілген.

Сонымен қатар, 2016 жылы KASE жариялаған «Қазақстан инжинириң» ұлттық компаниясының аффилиирленген тұлғалар тізіміне сәйкес, Сәуле Мұқашова — Нұрлан Сауранбаевтың қайын енесі екені көрсетілген.

 Сол кезде Нұрлан Сауранбаев «Қазақстан инжинириң» компаниясының директорлар кеңесін басқарған. Ал қазір ол шамамен алты айдан бері Көлік министрлігінің басшысы болып жұмыс істеп келеді.

Алайда Kompra.kz деректеріне сүйенсек, үш құрылтайшыдан бөлек, Kundybai Mining компаниясымен байланысы бар басқа адамдар да бар. Олардың арасында компанияның қазіргі бірінші басшылары — Руслан Хасанов пен Нұрсұлтан Әзізбеков те көрсетілген. Бірақ тізім тек осылармен шектелмейді.

Мәселен, Жанар Сейдуалиева — QazaqGaz-дың бұрынғы басшысы Қайрат Шәріпбаевтың алғашқы жары. Kompra.kz мәліметінше, Kundybai Mining компаниясының қалған 20 пайызы Сейдуалиеваға тиесілі.

2024 жылы Orda.kz жазғандай, Жанар Сейдуалиева бұрын Danco Commerce компаниясын басқарған. Ал осы компанияға қарасты «шебер­-немере» ұйым — «Bolashak Property» ЖШС 2022 жылға дейін QazaqGaz жалға алып отырған ғимараттың иесі болған.

Kompra.kz көрсеткен Kundybai Mining-пен аффилиирленген тағы бір адам — Данат Қасымқұлов.

Біріншіден, ол Ыдырысовтар әулетімен тығыз байланысты. Қасымқұлов бірнеше компанияда басшылық қызмет атқарады. Бұл компаниялар миллионер Дінмұхамед Ыдырысовқа, оның жұбайы Магда Ыдырысоваға, сондай-ақ олардың ұлдары — Камал Ыдырысовқа және Жармұхамед Аппазға тиесілі.

Сонымен қатар, Данат Қасымқұлов — Тимур Турловтың серіктестерінің бірі.

2021 жылдан бері Қасымқұлов IDK Mining компаниясының иесі. KASE деректеріне қарағанда, бұл компанияның, атап айтқанда, «Ай Қарааул» атты тау-кен компаниясында 21 пайыз үлесі бар. Ал сол компанияның қалған 50 пайызы жеке компания — Turlov Private Holding LTD-ке тиесілі.

Қысқасы, Kundybai Mining компаниясының айналасында осындай адамдар жиналған. Ал оның 20 пайыз акциясы 24 желтоқсанда аукционда сатылмақ. Егер ақшаңыз жетіп, қызығушылық танытып жатсаңыз, сол аукционға қатысып, үлесті сатып алуға болады.

Автор: Игорь Улитин