Қайтарылған актив қаржысына Ақтауда жедел жәрдем станциясы салынады

Ақтауда салынатын жедел жәрдем станциясы құрылысына 4,6 млрд. теңге бөлінді. Жылына 100 мың адам қабылдайтын жаңа жедел жәрдем станциясында оқу-имитациялық орталығы, жедел жәрдем көліктерін жөндеу және жуу орындары болады, деп хабарлайды Orda.kz.

Үш қабаттан тұратын үлкен ғимарат салынады. Жобаның жалпы құны 4,8 млрд теңге. Үкімет қайтарылған активтерге арнайы мемлекеттік қордан құрылысқа 4,6 млрд теңге бөледі. 100 млн теңге көлеміндегі қаржының бір бөлігі жергілікті бюджеттен бөлінеді.

Нысан Ақтау қаласындағы 34 А ықшам ауданындағы 2,6 гектар жер учаскесіне салынады. Бүгінгі таңда нысандағы жұмыстар 10 пайызға орындалды: қазу жұмыстары аяқталып, ішкі инженерлік желілер тартылды.

«Бұл станцияның ашылуы үш күрделі мәселені шешеді. Жаңа станцияның іске қосылуы халыққа жедел медициналық көмек көрсету уақытын тездетеді, еліміздегі қазір жиі кешіктірілетін медициналық көмек көрсеткішін көтереді, халық уақтылы ем алады. Бұл станцияның жеке оқу-тренингтік орталығы болады. Сондай-ақ, жабдықтар жаңартылады, оның 35 пайызы ескірген», - деді Маңғыстау облысы денсаулық сақтау басқармасы басшысының орынбасары Бибизада Дүйсенбаева.

Жалпы, бүгінде үкімет арнайы мемлекеттік қордан әлеуметтік маңызы бар нысандар құрылысына 55,2 миллиард теңгеден астам қаржы бөлді.

Оның ішінде төрт мектептің бірі музыкалық мектеп болады, сонымен қатар екі спорт кешені, көпсалалы аурухана кешені, жатақхана, екі балабақша бар.