«Қайраттың» «Олимпиакос» және «Брюгге» командаларына қарсы матчтары Астанада өтеді

Алматылық «Қайраттың» Чемпиондар лигасындағы өз алаңындағы матчтары Астана Аренада өтеді, деп хабарлайды Orda.kz.

«Қайрат» ФК УЕФА-мен бірлесе отырып, Чемпиондар лигасының жалпы кезеңінде «Олимпиакос» (9 желтоқсан) және «Брюгге» (20 қаңтар) командаларына қарсы үй матчтары «Астана Арена» стадионында өтетінін мәлімдеді.

Алматыдағы Орталық стадионда матчтарды қыста өткізу жанкүйерлер үшін қолайсыз: төменгі температура, шатырдың болмауы және қар жауу қаупі трибуналарда жайсыздық тудырып, алаң қызметінің жұмысын қиындатады. Сол себепті көрермендерге жайлы әрі қауіпсіз жағдай жасау үшін ойын жабық стадионда ұйымдастырылмақ.

«Билет бағасы 15 000–50 000 теңге аралығында болады. Сатылым 28 қарашада басталады. Бір адам екі билеттен артық рәсімдей алмайды» деп жазды клубтың баспасөз қызметі.

Сондай-ақ клуб Ticketon мамандары «Қайрат» ФК-ның үй матчтарына алынған абонемент иелеріне жалпы сатылым басталғанға дейін хабарласып, билет рәсімдеу және басымдықпен сатып алу тәртібі туралы толық ақпарат беретінін мәлімдеді.