«Қайрат» пен «Реал Мадридтің» алаңға шығатын ойыншылары анықталды

Бүгін кешке Алматының Орталық стадионында Қазақстан жанкүйерлері көптен күткен тарихи матч өтеді. Алматылық «Қайрат» пен мадридтік «Реал» Чемпиондар лигасы топтық кезеңінің екінші турында кездеседі, деп хабарлайды Orda.kz.

«Қайрат» сапында алғашқы минуттардан Қалмырза, Тапалов, Мартынович, Сорокин, Мата, Қасабулат, Арад, Мрынский, Жоржиньо, Громыко, Сәтпаев шығады.

«Реал Мадрид» бұл ойынға арналған старттық құрамын жариялады. Алғашқы минуттан алаңға келесі футболшылар шығады: Куртуа, Асенсио, Хёйсен, Алаба, Гарсия, Чуамени, Себальос, Гюлер, Мастантуоно, Винисиус, Мбаппе. Команданы бас бапкер Хаби Алонсо бастап шығады.

Orda.kz тілшісі тарихи кездесуден тікелей хабар таратып жатыр. Дәл қазір Орталық стадионға көп жанкүйер жиналды. Қолдарына «Қайраттың» жалаушаларын ұстаған жанкүйерлер командаларына қолдау көрсетіп, жеңіс тілеп тұр. Стадион маңында полиция мен жедел жәрдем қызметі күшейтілген тәртіпте жұмыс істеуде.

Еске сала кетсек, «Қайраттың» бас бапкері Рафаэль Уразбахтин баспасөз мәслихатында «Реал Мадридке» қарсы ойында ойыншыларға «ешкімнен қорқудың қажеті жоқ» екенін әрі командасынан не күтетінін айтқан еді. Айта кетейік, «Реал Мадридтің» бас бапкері Хаби Алонсо алматылық «Қайратты» жеке ойыншылар тұрғысынан да, команда ретінде де бағалап, олардың өз алаңында сенімді ойыны испандықтар үшін сынақ болуы мүмкін екенін айтты.