Қайрат Нұртастың жұбайы жоғарғы сотқа жүгінбек

Алаяқтарға алданып, пәтерінен айырылған Қайрат Нұртастың әйелі Жұлдыз Әбдікәрімова сотқа жүгінген болатын. Әбдікәрімова полицияға арыз беріп, қылмыстық іс қозғауды сұраған. Алайда оқиға жария болған соң, оған бейтаныс адамдар қоңырау шалып, таныстары арқылы интернеттегі ақпаратты өшіруді талап ете бастаған. Екінші сот отырысы өтті. Жұлдыз сот отырысына наразылығын білдіріп өз парақшасында жазба қалдырды, деп хабарлайды Orda.kz.

Жұлдыз Әбдікәрімова «TUMARGrandVillage» компаниясынан пәтер алмақ болған. Пәтерді біреудің атына жазуға келіскен соң біраз уақыт жалдамалы пәтерде көшіп жүрген. Ақыры пәтерін өз атына аудармақ болғанда пәтердің уақытша иелері қайтарудан бас тартқан. 

Ол сотқа жауап беруші тараптың келмегеніне және тараптарды тыңдап болғаннан кейін қосымша сұрақтар қойылмағанына наразы. Сондай-ақ екінші сот шешімімен келіспей, жоғарғы сотқа жүгінетінін мәлімдеді.

«Екінші сот отырысы өтті. Менің көңілім толмаған сәттер мыналар: Біріншіден, өткен отырыста сот өзі талап еткен жауап беруші тараптағы Дилара осы отырысқа қатыспады. НЕГЕ? Қарсы тарап соттың талабын орындамайтындай қандай күшке ие? Екіншіден, сот екі тарапты толық тыңдап болғаннан кейін, ешқандай қосымша анықтаушы сұрақтар қоймай, ақылдасу бөлмесіне үнсіз кетіп қалды. Бар болғаны 20 минутта шешім қабылданды. Бірінші болған сот шешімін өзгеріссіз қалдыруға шешім қабылданыпты. Соттың ресми шешімі жайындағы құжат келесі аптада шығады. Заң бұзушылық табылмады деген үкім айтылды. Естеріңізде болса, бірінші отырыста қаралмаған немесе назар салынбаған дәлелдер келтіргенімді айтқанмын. Бұл жолы да ол дәлелдер ескерусіз қалды. Сот шешімімен келіспейтінімді, мұнымен іс жабылмайтынын, Жоғарғы сотқа қайта шағымданатынымды хабарлаймын!», — деді Жұлдыз Әбдікәрімова.

Жұлдыз Әбдікәрімова азаматтық соттан бөлек, қылмыстық іс қозғалып жатқандығы, ол жақта сот мүлде басқа сарында болатынын да еске салды.