Қайрат Қожамжаровтың інісі елге заңсыз иеленген активтерді қайтаруы тиіс

Кәсіпкер Дулат Қожамжаров мемлекетке заңсыз өткен активтерді қайтаруы тиіс тұлғалардың тізіміне енді. Бұл шешімді Бас прокуратураның активтерді қайтару комитеті қабылдады, деп хабарлайды Orda.kz.

Үкімет бұл тізімді жария етпеуді жөн көрген, себебі оған енген тұлғалардың беделіне нұқсан келмеуі тиіс.

Nege.Aqsha мәліметінше, Қожамжаровтың өкілдері Бас прокурорға жүгініп, активтерді қайтару жөніндегі комиссияның шешімін қайта қарауды сұраған. Алайда, оларға бұл шешімнің заң аясында қабылданғаны түсіндірілді.

Айта кетейік, Дулат Қожамжаров – бұрынғы Бас прокурор және cенат депутаты Қайрат Қожамжаровтың туған інісі.

Forbes Kazakhstan мәліметінше, Дулат Қожамжаровтың дәулеті 110 миллион доллар деп бағаланып, ол Қазақстанның ең ауқатты кәсіпкерлері арасында 57-орында тұр. Ол Шымкентте өндірістік кешені бар, жан-жақты майлау материалдарын шығаратын Hill Corporation компаниясының иесі.