Қайрат Боранбаев бостандыққа шықты

Сотталған кәсіпкер Қайрат Боранбаев бостандыққа шықты. Енді ол пробациялық бақылауда болады.

Еске салайық, олигархтың бас бостандығынан айыру жазасының өтелмеген бөлігі бас бостандығын шектеу түріндегі жазаға ауыстырылды.

Қылмыстық атқару жүйесі комитеті Боранбаевтың 6 қарашада түрмеден шыққанын хабарлады.

«Мекеме әкімшілігі сотталғанға пробациялық бақылауды есепке алу және оны сипаттайтын материалдар жіберілетін пробация қызметіне келу бағыты мен уақытын көрсете отырып, жазасын өтеу орнына кетуге ұйғарым береді» делінген хабарламада.

Қайрат Боранбаевқа қатысты үкім осы жылдың наурыз айында шыққан. Мемлекет мүлкін жымқыруға қатысқаны үшін мүлкі тәркіленіп, мемлекеттік қызметте лауазымдарды атқару құқығынан өмір бойына айырумен алты жылға бас бостандығынан айырылды. Қазан айында сот Боранбаевтың өтінішін қанағаттандырып, жазаның өтелмеген бөлігін бас бостандығын шектеуге ауыстырды. Боранбаев екі жыл төрт ай түрмеде отырды.