Қадыровқа қарсы шыққан: Алматыда шешен белсендісі ұсталды

Рамзан Қадыровқа қарсы пікір білдірген шешен белсендісі Мансур Мовлаев Алматыда ұсталды. Жақын арада оған қатысты бұлтартпау шарасын анықтайтын тергеу соты өтпек, деп хабарлайды Orda.kz.

Мовлаевты қорғаумен Алматы адвокаттар алқасының мүшелері Мұрат Адам, Рена Керимова және Елена Жигалёнок айналысады. Елена Жигалёнок «Орда» редакциясына белсендінің ұсталуына қатысты мәлімет берді:

«Мансур – азаматтық белсенді. Чешен Республикасында оған бірнеше рет қауіп төнген, қудаланған, жалған іс бойынша сотталған. Жазасын өтеген соң Ресейден кетуге мәжбүр болды. Екі күн бұрын оны ұстады», – деді Жигалёнок.

Белсенді мен оның қорғаушылары тергеу сотын күтіп отыр:

Адвокаттың айтуынша, қорғау тарабы Мовлаевты Ресейге бермеу үшін бар күшін салады. Себебі онда белсендіні экстремизм айыбымен федералды іздеуге жариялаған.

«Басты мақсатымыз – экстрадицияға жол бермеу. Біз оны баспана іздеуші тұлға ретінде тіркеуді сұраймыз. Егер Мансур Ресейге қайтарылса, оның өмірі мен денсаулығына қауіп төнеді деп есептейміз», – деді Жигалёнок.

Ашық дереккөздердің мәліметіне қарасақ, 2022 жылы Мовлаев Шешенстандағы жасырын түрмеден қашып шығып, құжатсыз әрі ресми мәртебесіз Қырғызстанға өткен. 2023 жылы Бішкек соты белсендіні алты айға бас бостандығынан айырып, жазасын өтеген соң, елден шығару туралы шешім шығарған. 2024 жылдың қазан айында Мовлаев Шешенстандағы оның ағалары Зелимхан мен Хамзаттың ұрланғанын хабарлады.