«Қабырғасын сындырсам да, ол менің әйелім»: Қызылорда тұрғыны жұбайын соққыға жықты

Қызылорда облысының Тасбөгет кентінде ер адам ауруханада әйелін соққыға жығып, қабырғасын сындырды. Оған қатысты полицияға арыз түсті, деп хабарлайды Orda.kz.

Сауле Әкімова күйеуінің үстінен шағымданып, полиция бөлімшесіне барды. Ол жылдар бойы қорлық көріп, ұрып-соғуға шыдап келгенін айтты.

«Ол мені мас кезінде де, сау кезінде де ұрады. Балалардың көзінше боқтап, қорлайды. Мен ауруханада тазалықшы болып жұмыс істеймін, ол мұнда істейтін барлық ер адамнан қызғанады», – дейді әйел.

Жәбірленушінің екі баласы бар. Оның айтуынша, күйеуі үнемі ашушаң болған. Бұл жолы әйелінің дәрігермен сөйлескенін көріп, қызғаныштан өзін ұстай алмай, ауруханада жұрттың көзінше әйелін ұрып-соққан.

Отбасылық жанжал шығарған ер адамнан мұндай әрекетке не үшін барғанын сұрағанда, ол айқайлап:

«Бұл менің әйелім, не істесем де – өзім білемін!» – деп жауап берген.

Құқық қорғау органдарына жүгінгеннен кейін Сәуле балаларымен бірге дағдарыс орталығына орналастырылды.

Полиция «Дене жарақатын қасақана келтіру» бабы бойынша тергеу жүргізіп жатыр.

«Отбасын қорғау мақсатында III топ мүгедектігі бар күдіктіге қатысты қорғау нұсқамасы шығарылды. Қызылорда қалалық полиция басқармасының отбасылық зорлық-зомбылықпен күрес бөлімі профилактикалық жұмыстарды бастады»,  деп хабарлады Қызылорда облыстық полиция департаменті.

Ведомство істің полиция бастығының бақылауында екенін мәлімдеді.