Кабулдан ұшқан ұшақта неше адам болғаны белгілі болды

Желіде Ауғанстан тұрғындарының АҚШ бақылауында қалған жалғыз нысан Кабул әуежайына жаппай жүгіргендері туралы көп айтылды, таралды. Бүгін елін тастап, қашқан адамдардың ұшақтағы суреті жарияланды.

Бұл туралы Orda.kz The Sun-ға сілтеме жасап хабарлады.

Суретте С-17 жүк көлігінің салоны толы екенін көруге болады.

150 сарбазды немесе 171 000 фунт жүкті қабылдауға ыңғайлы жабдықталған ұшақ адамдарға толған. Еркегі бар, әйелі бар, баласы бар нығыздалып тұр.

– АҚШ әуе күштерінің C-17 экипажы RCH 871 қосымша жолаушылар болғанына қарамастан «кетуге шешім қабылдады», - деді АҚШ қорғаныс министрлігінің аты-жөнін атамаған қызметкері.

Әуе қозғалысының диспетчерлері бастапқыда 800 жолаушы кірді деген, алайда шығатын кезде 640 адам тіркеуден өткен.

Еске салсақ, бұған дейін желіде Ауғанстан тұрғындарының Талибан билігінен қашып, әуежайға қарай бет алғандары бейнеленген видеолар тарады. Ұшаққа сыймаған адамдар оның қанатына жармасқан.

14 сәуірде АҚШ президенті Джо Байден қыркүйектің 11-не дейін Ауғанстаннан әскерін шығаратынын мәлімдеген. 4 мамырда Талибандар 7 провинцияда шабуыл бастаған. Ал 7 маусымда жағдай ушығып, 34 провинцияның 26​​-сында шайқастар болды. 21 шілде Талибандар елдің жартысын өз бақылауына алды. 15 тамызда басты қала, елдің астанасы Кабулды басып алды.