Күзге дейін қант бағасы 15 пайызға қымбаттайды – сарапшы

Қазақстанда қант бағасы әлі қымбаттайды. Energyprom сарапшылары  күзге дейін шекер құны тағы 15 пайызға өсетінін айтты. Қант бағасы бір жылда 60,5 пайызға көтерілген. Бұл былтырғымен салыстырғанда үш жарым есеге көп екені айтылды.

Әлеуметтік дүкендердегі қанттың бір келісі 500 теңгеден сатылып жатыр. Басқа сауда нүктелерінде 700 теңгеге дейін жеткен.

Сарапшы Кирилл Павлов Үндістан қант экспортына тыйым салғанын айтып, күзден кейін ғана қант бағасының арзандауы мүмкін екенін жеткізді.

– Күз - нағыз шаруа мен егістіктің кезеңі. Биылғы өнім сол мезгілде қайта жинала бастайды. Сонда ғана баға түседі. Ал оған дейін тағы 15 пайызға көтеріледі деп болжап отырмыз. 24 және 25 мамырдағы бағаның құбылуына да өзіндік себептер бар. Үндістан қант экспортына тыйым салды. Ол әлемдік бес ірі эспортерлердің бірі. Жаһандық логистикадағы қиындықтар да саудаға кері әсерін тигізді, - деді Павлов КТК арнасына берген сұхбатында.