Кәсіподақ: ең төменгі жалақы мәселесін көтеру қажет

Елімізде еңбекақы мен оның жүйесін қалыптастыруға қатысты белгілі бір жолға қойылған тұжырымдық жүйе жоқ. Халықаралық дөңгелек үстел барысында бұл мәселе де шет қалмай, тілге тиек етілді.  

Онлайн өткен жиынға Қазақстан кәсіподақ федерациясы мен Халықаралық еңбек ұйымдарының өкілдері  қатысты. Мамандар еліміздегі еңбек жүйесі мен оның қалыптасу жолдарын сөз етті.

Сонымен қатар жалақыны жыл сайын заңнамалық тұрғыда индекстеу мәселесі де көтерілді. Кәсіподақ ұжымдық шарттар мен салалық келісімдердің құқықтық маңызы мен рөлін көтеріп, нақтылап  бекітуді көздейді. Ең бастысы бұның бәрі  мәселе күйінде қалмай, заңды түрде шешілуі қажет.

Кәсіподақ федерациясы осы тұрғыдағы талабы мен ұстанымын Үкіметке жібермек.

— Бізде үш жылдан бері ең төменгі жалақы мөлшері өзгерген жоқ. 42500 теңге мөлшерінде тұр. Кәсіподақтар осы төменгі жалақыны кезең-кезеңімен ұлғайтуды көздейміз. Оны қандай мөлшермен ұлғайту керек дегенге келсек,  бізде халықаралық еңбек ұйымының ұсынысы бар. Алдыға кеткен, дамыған елдерде қалыптасқан жағдай – ол сол ел бойынша бекітілген орта жалақының 50 пайызынан төмен болмауы керек, - дейді  ҚР Кәсіподақтар федерациясының төрағасы Сатыбалды Дәулеталин.