Кәсіпкерлер  мемлекеттік тілдегі тауар заттаңбасын  қажетсінбейді

Кәсіпкерлер тауарлардағы мемлекеттік тілдегі жапсырмалар мен заттаңбаларды алып тастауды сұрады. Бүгін Нұр-Сұлтанда Дағдарысқа қарсы шаралар жөніндегі штабтың отырысы өтті.

ҚР Премьер-Министрі Әлихан Смайыловтың төрағалығымен Дағдарысқа қарсы шаралар жөніндегі жедел штабтың кезекті отырысы өтті. Бизнес-қоғамдастық өкілдері импорттық тауарларға қатысты мемлекеттік тілдегі  заттаңбалар  (этикетка) мен қосымшаларды жапсыру туралы заңнама талаптарын уақытша алып тастауды ұсынды.

Олардың пікірінше, мұндай шешімнің қабылдануы заттаңбаларды әзірлеуге, қайталауға және бекітуге байланысты бизнес шығындарын айтарлықтай төмендетуі мүмкін. Ал балама ретінде сауда сөрелерінде тауар туралы барлық қажетті ақпаратты қамтитын тауар QR кодтарын уақытша пайдалану ұсынылды.

 «Бизнес-қоғамдастық өкілдері өз ұсынысында мемлекет басшысына басқа реттеу тәртібін белгілейтін тапсырмалар беруге немесе актілерді қабылдауға, оның ішінде заңнамалық актілерді енгізу шеңберінде 2020 жылғы 20 наурыздағы № 286 Қазақстан Республикасы Президенті Жарлығы ережелеріндегі мемлекеттік бақылау, халықаралық міндеттемелерді сақтау және тағы басқаларды басшылыққа алды» деді жедел штаб.

Премьер-министр кәсіпкерлердің бастамасын қолдап, осы аптаның соңына дейін Қазақстан Республикасы Президентінің тиісті жарлығының жобасын дайындауды, сондай-ақ оны мемлекет басшысының қарауына шығаруды тапсырды.

 Жедел штабтың келесі отырысы 24 наурызға жоспарланған.