Кәсіпкерлер Бекшиннен карантинді жеңілдетуді сұрады

«Атамекен» Ұлттық кәсіпкерлер палатасы үндеу жасады.

Бұл туралы Orda.kz Атамекен сайтына сілтеме жасап хабарлады.

Олар Алматының санитарлық дәрігері Жандарбек Бекшинге алдағы күндері «қызыл» аймақта орналасқан мегаполистің шектеу шараларын жеңілдетуді сұрады.

– Кәсіпкерлердің басты сұранысы - бизнесті және жұмыс орындарын сақтау үшін оларға жұмыс істеуге мүмкіндік беру. Егер бұл мүмкін болмаса, онда зардап шеккен бизнеске былтырғыдай тиісті мемлекеттік қолдау көрсетуі керек.

«Атамекен» Ұлттық экономика министрлігімен бірлесіп, қызметіне әлі де болса тыйым салынған немесе шектелген кәсіпкерлікті мемлекеттік қолдаудың қосымша шаралар пакетін дайындауда.

ҰКП жүргізген сауалнамаға сәйкес, кәсіпкерлерге ең көп қолдау көрсету шаралары:

• салықтар мен несиелерді кейінге қалдыру;
• қолданыстағы несиелерді қайта қаржыландыру;
• жалақы қорынан салықтар мен төлемдерден босату;
• жалдау ақысы мен коммуналдық төлемдерді төлеуге көмек.

Өздерінің қызметкерлері үшін бизнес өкілдері 42 500 теңге көлеміндегі әлеуметтік төлемдер мен тұтынушылық несиелер бойынша төлеу мерзімін ұзартуды сұрайды.

Айта кетсек, бүгін Алматы қаласының бас санитарлық дәрігерінің жаңа қаулысы шықты.