Кәрім Мәсімов тағы бір қылмыс бойынша айыпталуда

Ұлттық қауіпсіздің комитетінің экс-басшысы Кәрім Мәсімовке қатысты да билікті басып алу фактісі бойынша қылмыстық іс басталды.

ҰҚК-нің бұрынғы басшысы Кәрім Мәсімовке бұған дейін мемлекетке опасыздық жасады деген күдік келтірілген.

«Аталған іс аясында билікті күшпен басып алуға және лауазымдық өкілеттіктерін асыра пайдалануға бағытталған іс-әрекеттер фактілері бойынша қосымша сотқа дейінгі тергеп-тексерулер басталды» деп хабарлады ҚР ҰҚК.

Бұл іс бойынша Мәсімовтен басқа ҰҚК төрағасының бұрынғы орынбасары – «А» арнайы мақсаттағы қызметінің бастығы Әнуар Садықұлов пен ҰҚК төрағасының орынбасары Дәулет Ерғожин ұсталды.

Тергеу жалғасуда.

Еске салсақ, 6 қаңтар күні президент Тоқаев ҰҚК басшысын отставкаға жіберген болатын. Екі күннен кейін Мәсімовтың мемлекеттік опасыздық бойынша айыпталып ұсталғаны туралы хабарланды.