Күрес федерациясының президенті Дәулет Тұрлыханов болды

Азия күрес федерациясының президенті және UWW бюросының мүшесі Дәулет Тұрлыханов Грек-рим, еркін және әйелдер күресі федерациясының президенті болып сайланды.

Olympic.kz сайтының хабарлауынша, күрес федерациясының кезектен тыс конференциясында спорт құрылымының экс-президенті Ерлан Қожасбай қызметінен кету туралы шешім қабылдаған. Ол Дәулет Тұрлыхановтың кандидатурасын ұсынған. Конференцияға қатысушылардың бірауыздан шешімімен Тұрлыханов федерация президенті болып сайланды.

Еске салсақ, Тұрлыханов бұған дейін ұйымның вице-президенті қызметін атқарған.

Дәулет Тұрлыханов – кеңестік және қазақстандық грек-рим күресінің палуаны, КСРО-ның еңбек сіңірген спорт шебері (1989), Қазақстан Республикасының еңбек сіңірген жаттықтырушысы. Сонымен қатар, Дәулет Тұрлыханов – 1989 жылғы әлем чемпионы және 1993 жылғы әлем вице-чемпионы, Еуропа (1988) және Азия (1995) чемпионы, Олимпиаданың күміс (1988) және қола (1992) жүлдегері, сегіз дүркін КСРО чемпионы.