Көліктің ішінде ойнап отырған екі бала тірідей жанып кетті (видео)

Ақтөбе облысы Әйтеке би ауданында көлік өртеніп кетті. Қайғылы оқиға орын алған кезде ішінде екі бала ойнап отырған.

Бұл туралы Orda.kz Астана телеарнасына сілтеме жасап хабарлады.

3 және 7 жасар ағалы-інілі бауырлар есік алдында бұзылып тұрған көліктің ішіне кіріп ойнаған. Сол сәтте көлік кенеттен отқа оранған. 3 жасар бала тірідей жанып кеткен. Ал 7 жасар ағасын 4-ші дәрежелі күйік шалған. Аудандық аурухананың дәрігерлері мен Ақтөбеден келген мамандар бүлдіршіннің өмірі үшін күрескенімен бала есін жимастан көз жұмды.

 – Қаладан медициналық авиациядан құрамында реаниматолог-анестезолог және комбустиолог, травматолог дәрігер жолданды. Барлық қажетті медициналық көмек көрсетілді. Өкінішке орай көрсетілген емнің нәтижесі болмай, бала қайтыс болды, - деді Ақтөбе облысы денсаулық сақтау басқармасы басшысының орынбасары Айгүл Құштаева.

Өрттің неден шыққаны белгісіз. Тергеу амалдары жүріп жатыр.