Көлгінов вакцина салдырған елордалықтар арасында пәтер ойнатпақ

Нұр-Сұлтан қаласының әкімі Алтай Көлгінов қала тұрғындарын вакцина салдыруға ынталандыру мақсатында жүлдеге екі бөлмелі пәтер тағайындап, бір адамға сыйламақ.

Бұл туралы Orda.kz. хабарлайды.

«Қызыл» аймақта орналасқан ел астанасы халқының 60%-дан астамы вакцина алуы қажет екен.

– Ұжымдық иммунитетті қалыптастыру үшін қала халқының 60%-дан астамы вакциналануы қажет. Санитарлық дәрігерлер карантиндік қосымша шектеулер туралы жаңа қаулы дайындауда: қауіп-қатер тобы үшін екпе алу міндетті, вакциналанбаған қызметкерлерді қашықтан жұмыс істеу режиміне көшіру талап етіледі, - деп жазды көлгінов instagram парақшасында.

Екі бөлмелі пәтердің кілті жаңадан вакциналанғандар арасында ойнатылады.

– Қала тұрғындарын ынталандыру үшін бағалы сыйлықтардың ұтыс ойынын енгізіп жатырмыз. Ал жаңадан вакцина алғандар арасында екі бөлмелі пәтер ойнатпақпыз (инвесторлар есебінен). Ұтыс ойынына қала емханаларында немесе СОО/СҮ пункттерінде екпе алған қала тұрғындарының бәрі қатыса алады.

Ал пәтер ұтысының ойынына осы жылдың 25 маусымы мен 31 тамызы аралығында вакцинаның бірінші компонентін алатын 18 жастан асқан қала тұрғындары қатыса алады. Қыркүйек айының басында нәтижесін жариялаймыз. Конкурстың әділ өтуі және вакцинацияланғандарды толығымен қамту үшін (көрсетілген кезеңде) IT-қоғамдастықты жұмылдырамыз.