Әйелін өртеген ер адам қамауға алынды

Кеше Павлодар облысы Розовка ауылының 34 жастағы тұрғыны №1 қалалық аурухананың жан сақтау бөлімінде қайтыс болды.

Бұл туралы Orda.kz pavlodarnews.kz сайтына сілтеме жасап хабарлайды.

Ауылдардың бірінде ер адам әйелін өртеп жібергені туралы хабар полицияға 2021 жылдың 8 тамызында түсті.

Түнгі сағат екі шамасында ерлі-зайыптылар арасында жанжал шықты. Әйелі тыйым салғанына қарамастан, ер адам мас күйінде өз көлігімен кетуге тырысты.

– Жанжал барысында жұбайы тоңазытқыштан алған спиртті жұбайына шашып, от жағып жіберген, – деді облыстық полиция департаменті бастығының бірінші орынбасары Жасқайрат Қайыров.

Зардап шеккен әйел Павлодар қаласының ауруханасына жатқызылды. Аталған факті бойынша ҚР ҚК 107-бабы бойынша сотқа дейінгі тергеу жүргізілді.

–  Өкінішке қарай, 2021 жылдың 17 тамызында жәбірленуші алған жарақаттарынан қайтыс болды. Осыған байланысты, сотқа дейінгі тергеу қылмыстық кодекстің 106-бабы 3-бөлігіне ауыстырылды, – деп хабарлады Жасқайрат Қайыров.

Күдікті уақытша ұстау изоляторына қамауға алынды.