Күдікке ілінген Жапаров туралы не белгілі?

Жақында Антикор Алматы облысы ауыл шаруашылығы басқармасының экс-басшысы екінші рет бюджет қаржысын жымқырды деген күдікке ілініп отырғанын хабарлады.

«Ол алғаш рет шаруа қожалықтарына субсидияларды негізсіз есептеді деген күдікке ілінді. Бұл өткен жылдың тамыз айында болған. Кейін ақталып, креслосына қайта оралды. «Жапаровты «Самұрық-Қазына» қорының экс-төрағасы Ахметжан Есімовтің «туысы» деген қауесет бар. Ол оған істі «шешуге» көмектескен-мыс» делінген abzhannews телеграмм каналында.

Облыстың бас ауыл шаруашылығы қызметкері қызметін аяқтағанына бірнеше ай өткені сол еді, оның үстінен ҚР Қылмыстық кодексінің 189-бабы «Сеніп тапсырылған бөтеннің мүлкін иемдену немесе жымқыру» бойынша қылмыстық іс қозғалды.

«Жапаров жоғары бағамен ауыл шаруашылығы техникасын жеткізу арқылы 50 миллион теңге бюджет қаражатын жымқырды деген күдікке ілінген. Алайда Алматы облысының сыбайлас жемқорлыққа қарсы қызметі ақпаратқа қатысты түсініктеме бермеді. Олар фактіні жоққа шығармайды да, растамайды да» делінген жазбада.