Юсуф Альджавдера Астана әуежайының басқарма төрағасы болып тағайындалды

Өткен жылдың мамыр айынан бері бұл қызметті Ерғазы Жолдасов атқарып келеді.

Бұл туралы Қазақстанның Азаматтық авиация комитеті хабарлады.

«Нұрсұлтан Назарбаев халықаралық әуежайы» АҚ басқарма төрағасы қызметіне Юсуф Рашед Мохаммед Альджавдерані тағайындау үкіметпен келісім бойынша өтті. Әуежайдың жаңа төрағасы 25 жылдан бері авиация саласында еңбек етіп келеді.

Ол бұған дейін Emirates, British Airlines, Дубай және Абу-Даби халықаралық әуежайларында түрлі қызметтер атқарған.

ААК 2023 жылдың қарашасынан бастап елорда әуежайы Terminals Holding компаниясының сенімді басқаруында екенін түсіндіреді. Инвестор 2024 жылдың 1 мамырынан бастап әуежайдың ұшу-қону жолағын күрделі жөндеуден өткізуді жоспарлап отыр. Нысанның инфрақұрылымы жеке қаражат есебінен жаңартылады.

Елорда әуежайы елдегі жолаушылар тасымалы бойынша Алматы халықаралық әуежайынан кейінгі екінші орында.