«Үйімді тастап, қашуға мәжбүр болдым». Ауғанстанда жағдай қалай?

АҚШ пен НАТО Ауғанстаннан әскерін шығарғалы бері Талибандардың үстемдігі мен шабуылы күшейген. Салдарынан бейбіт халық зардап шегіп жатыр.

Бұл туралы Orda.kz Хабар24-ке сілтеме жасап хабарлады.

Халық қарулы топтардың Ауғанстанның солтүстігінде қатаң тәртіп орнатқаны үшін үйлерін тастап қашқан.

Қазір Құндыз провинциясында 12 мың үй қаңырап бос тұр. Көбі үкімет бақылауындағы территориялардан пана іздеп келген. Уақытша шатырда тұруға мәжбүр болған халыққа ауыз су мен азық-түлік керек.

– Балам тәліптер келсе өлтіреді деп айтқан соң бір түнде үйімізді тастап кеттік. Екі күн бойы шөл дала мен тау-тасты кезіп осы жерге әзер жеттік, - деді тұрғындардың бірі.

Белгілі болғандай, қазір Талибандар 400 ауданға үстемдік орнатқан. Қарулы топтар АҚШ-қа берген сөзіне қарамастан шаһарларды шетінен басып алып жатыр. Мысалы, Түркіменстан және Тәжікстанмен шекаралас бірқатар аудандар Талибандар бақылауында.

Дегенмен, Талибандар Орталық Азияға қарсы шықпаймыз деп отыр.