Үйі өртеніп, нәрестесінен айрылған отбасына үй берілді

Қызылордада үйі өртеніп, нәрестесі қаза болған Текебаевтар отбасына жаңа баспана берілді, деп хабарлайды ORDA тілшісі.

2021 жылдың 18 ақпанында облыс орталығындағы Әл-Фараби мөлтек ауданында үй өртенген. Шұғыл жеткен өрт сөндіру бөлімінен 3 техника мен 16 қызметкер жұмылдырылып, өртті тұтастай сөндірген. Оқиға салдарынан 2020 жылы дүниеге келген нәресте көз жұмды.

Ал көз жұмған нәрестенің анасы бірінші дәрежелі көмір қышқыл газына улану және сол жақ білектің және екі алақанының термиялық күйік шалу нақтамасымен қалалық ауруханаға жатқызылды. Қазір жағдайы бірқалыпты.

Әкімдік тарапынан, кәсіпкерлердің қолдауымен қазіргі таңда зардап шеккен көпбалалы отбасы 1 айға жететін азық-түлікпен қоса мектеп құрал-жабдығымен қамтамасыз етілді.

Бүгін облыс әкімі Гүлшара Әбдіқалықова Текебаевтар отбасына көңіл айтты. Сонымен қатар үй иелерін жаңа баспанамен құттықтап, тұрмысқа қажетті сыйлықтар табыс етті.

– Қайғының орнын толтыру мүмкін емес. Жалпы, Сыр елі үшін бұл ауыр қаза болды. Көзге көрінген балаларымыз аман болсын, деді облыс әкімі.