Әйгілі Панфилов дивизиясының соңғы жауынгері 100 жасқа толды

Баршаға белгілі  Панфилов дивизиясының Алматыда тұратын көзі тірі соңғы жауынгері, Ұлы Отан соғысының ардагері Қайырлы Жонқабаев 100 жасқа толды.

 Бұл туралы  Orda.kz   «Хабар 24» арнасына сілтеп хабарлайды.

Майдангерді Ұлттық ұлан «Оңтүстік» өңірлік қолбасшылығының әскери қызметкерлері арнайы барып құттықтап, құрмет көрсетті. Үрмелі аспаптар оркестрі құрметті ардагерге  соғыс жылдарындағы әндерді орындап, бір қуантты.  

Қайырлы Уатайұлы 1921 жылы 10 қыркүйекте Шығыс Қазақстан облысында дүниеге келген. 1941 жылы Панфилов дивизиясының 23-гвардиялық полкіне алынып, пулеметші болған. Сол кездегі КСРО құрамына кіретін Беларусь, Польшаны, Эстонияны азат етуге қатысқан. Қарт жауынгер Кеңес Одағының батыры Мәлік Ғабдуллинмен бір ротада болғанын құрметпен еске алады.

— Қайырлы атамызды жылда осылай жылда қошеметтеп туған күнінде және де осы басқа да мерекелік күндері келіп құттықтап тұрамыз. Өйткені бұл кісінің соғыс жылдарындағы көрсеткен ерлігі, жанқиярлық ерліктері және осы соғыс аяқталғаннан кейін еліміз үшін атқарған қызметтері кейінгі ұрпаққа үлгі болып келеді, – деді Ұлттық ұлан «Оңтүстік» өңірлік қолбасшылығы қолбасшысының орынбасары Ниязтай Әлкешов.

Мереке сайын құттықтап келіп тұруға уәде берген әскери қызметкерлерге ғасыр жасаған абыз қария ақ батасын беріп, жақсылық тіледі.

— Елімізде тыныштық болсын. Келешектерің зор болсын. Дендерің сау болсын. Аман-есен болыңдар, – деді ардагер.  

Қарт жауынгер  майдан даласында көрсеткен ерліктері үшін «Қызыл Жұлдыз», ІІ дәрежелі «Отан соғысы» орденімен және көптеген медальдармен марапатталған.