Эвакуатордан ұрланды: 30 миллионның көлігі қолды бола жаздады

Павлодар тұрғыны Алматыдан жаңа LI-9 сатып алып, автосалоннан үйге жеткізетін эвакуаторға тапсырыс береді. Алайда, алаяқ іске араласып, эвакуатор жүргізушісіне қоңырау шалып, өзін көлік иесімін деп таныстырған. Ол тасымалдау ақысын жартылай төлегенін айтып,  маршрутты өзгертіп, автокөлікті тұрақта қалдыруды өтінген,  деп хабарлайды Orda.kz.

Жүргізуші өтінішті орындаған. Осыдан кейін ұры басқа эвакуаторды шақырып, автокөлікті қала сыртына шығарған. Жоспар қарапайым: көлікті автосервиске жеткізіп, ізін «жауып», сатуға дайындау.

Оның иесі дер кезінде GPS арқылы көліктің белгісіз бағытта келе жатқанын байқап, полицияға хабарлаған. Жамбыл облысының патрульдік полициясы автокөлікті тауып алып, иесіне қайтарып берді, ал күдікті ұсталды.

Бұған дейін Алматыда Lexus-ты ұрлау оқиғасы ашылып, бетперде киген адам өзінің бұрынғы жол талғамайтын көлігін ұрлауға тырысты.