Эскорт, жезөкшелер үйі және бала саудасы: ІІМ адам саудасының заңсыз нарығын әшкереледі

Қазақстанның барлық өңірінде адам саудасына байланысты қылмыстық істер тіркелді, деп хабарлайды Orda.kz.

ІІМ мәліметінше, биыл 39 факті анықталған, оның алтауы кәмелетке толмағандарға қатысты. Мысалы, Алматыда полиция жаңадан босанған әйелдерді ақшаға баласын беруге үгіттеген топты ұстады.

«Ұйымдастырушылар бойжеткендердің қиын жағдайын пайдаланған. Қазір тергеушілер 20-дан астам қылмыстық істі қарап жатыр. Күдіктілердің мүлкі тәркіленіп, 18 жылға дейін бас бостандығынан айырылуы мүмкін», – деді полицейлер.

Абай облысында тұрғындарды күштеп жұмыс істеткен жағдайлар анықталды. 11 қылмыстық іс қозғалып, материалдар сотқа жолданды.

Шымкентте, Ақтөбе, Жамбыл, Батыс Қазақстан, Қарағанды және Қостанай облыстарында полиция қазақстандықтарды, соның ішінде кәмелетке толмағандарды, түнгі ойын-сауық орындарында қанап, жұмысқа жеккендердің ісін тоқтатты.

Астанада құқық қорғау органдары теміржол вокзалы маңында рейд жүргізіп, сегіз адамды жезөкшелер үйі бар деп және жыныстық қанау бойынша қылмыстық жауапкершілікке тартты.

Ақмола облысында отбасынан бас тарту мен ретсіз жыныстық қатынасты насихаттаған діни топ анықталды. Тыйым салынған әдебиеттер мен ритуалдық заттар тәркіленіп, сараптама тағайындалды.

Бұған дейін Астана, Алматы және Шымкентте «элиталық эскортты» ұйымдастырып, барлар мен клубтарда қыздарды арбаған топтардың ісі тіркеліп, ол істер сотқа жіберілген.

Еске сала кетсек, өткен жылы елде адам саудасының 141 фактісі анықталған, оның 19-ы балаларды сату бойынша. ІІМ дерегінше, балаларды делдалдарға 500 мың теңгеден бастап сатуға тырысқан. Полиция интернеттегі хабарландыруларды бақылап, жедел желілер және ҮЕҰ-мен бірлесіп жұмыс істеп келеді. Ең жиі тіркелетін қылмыстар жезөкшелер үйі мен жеңгетайлық.