Эммануэль Макрон Тоқаевпен телефон арқылы сөйлескеннен кейін қазақ тілінде жазба жариялады

Француз тарапының бастамасымен Қазақстан президенті Қасым-Жомарт Тоқаев пен Франция президенті Эммануэль Макрон телефон арқылы сөйлесті, деп хабарлайды Orda.kz.       

Келіссөзден кейін Франция президенті X әлеуметтік желідегі парақшасында әңгіме барысы туралы жазба жариялады.

«Біз стратегиялық әріптестігімізді нығайту мәселелерін, әсіресе көлік және энергетика салаларындағы ынтымақтастықты талқыладық. Бұл әңгіме 2023 жылғы қараша айында менің Қазақстанға жасаған сапарым мен өткен қарашада президент Тоқаевтың Францияға жасаған мемлекеттік сапарының жалғасы болды» деп жазды Эммануэль Макрон.

Сонымен қатар мемлекет басшылары халықаралық күн тәртібіндегі өзекті мәселелерді сөз етті. Әңгіме барысында Ресейдің Украинаға қарсы соғысы мен Оңтүстік Кавказдағы келіссөздер үдерісі негізгі назарда болды.

Қос тарап Қазақстан мен Франция арасындағы қарым-қатынастың оң серпінін атап өтіп, сауда-экономикалық ынтымақтастықты кеңейтуге келісті.

Сонымен қатар мемлекет басшысы Қырғызстан астанасына сапары барысында қаланың көрнекті орындарына барып,  жазушы, соғыс ардагері, әкесі Кемел Тоқаевтың есімімен аталатын № 33 мектеп-гимназиясын да аралап көрді.