«Эммануэль Макрон не дейді?»: Париж прокуратурасы Дуровқа тағылған айыпты растады

Париж прокуратурасы Дуровтың ұсталуына Telegram-да модерация болмауы себеп болғанын растады.

Бұл туралы «Новая-Европа» басылымы хабарлады.

Прокуратураның айтуынша, Дуровқа қарсы сот ісі 8 шілдеде басталған екен. Кәсіпкерге қатысты күдік келесі айыптар бойынша тағылып отыр.

• Ұйымдасқан топтардың заңсыз мәмілелерін жүзеге асыруға арналған онлайн платформаны басқаруға қатысу;
• Құқық қорғау органдарының тергеу жүргізуге және оны қолдануға қажетті ақпаратты немесе құжаттарды беру туралы сұраныстарынан бас тарту;
• Кәмелетке толмағандардың порнографиялық контентін тартуға қатысу;
• Есірткіні таратуға қатысу;
• Киберқылмыстарға қатысу;
• Ұйымдасқан қылмыстық топтардың құрамында алаяқтыққа қатысу.

Бас-аяғы Павел Дуров 12 қылмыс бойынша күдікке ілінген. Оның 28 тамызға дейін қамауда болатыны бүгін мәлім болды. 

Сонымен қатар, Франция Президенті Эммануэль Макрон Дуровтың тұтқындалуының астарында саяси мән жоқ екенін айтты.

Макрон бұл туралы өзінің Х парақшасында  хабарлады.

«Құқық үстемдігі жағдайында, әлеуметтік желілерде, шынайы өмірдегідей бостандық заңмен белгіленген шектеулер аясында жүзеге асырылады. Бұл азаматтарды қорғау және олардың негізгі құқықтарын құрметтеу үшін қажет. Франция әр адамның өз ойын ашық айту бостандығына, инновациялар мен кәсіпкерлік рухқа терең берілген және солай болып қала береді», — деп жазды Макрон.