Йеменде хуситтер үкіметінің басшысы мен бірқатар министрлер қаза тапты

2025 жылғы 28 тамызда Израильдің Йемен астанасы Сана қаласына жасаған соққысының нәтижесінде хуситтер үкіметінің премьер-министрі Ахмед әл-Рахави және бірнеше министр қаза тапты. Бұл туралы Orda.kz сайты Йеменнің SABA ақпарат агенттігіне сілтеме жасап хабарлайды.

Соққы үкіметтің Сана қаласында өткен кезекті отырысы кезінде жасалған. БАҚ мәліметінше, Израиль әскері жоғары лауазымды шенеуніктер қатысқан бірнеше нысанды бір уақытта атқылаған. Олар «Ансар Аллах» қозғалысы жетекшісінің сөзін тыңдау үшін жиналған болатын. Reuters агенттігінің хабарлауынша, қаза тапқандардың арасында хуситтер қорғаныс министрі мен штаб бастықтары да бар.

Кейін Израильдің қорғаныс министрі Исраэль Кац бұл шабуылға қатысты пікір білдіріп, Израиль қорғаныс армиясы Йемендегі хуситтердің жоғарғы басшылығын жойғанын растады.

«Біз Йемендегі хуситтердің террористік ұйымының қауіпсіздік пен саяси саладағы жоғарғы басшылығына бұрын-соңды болмаған ауыр соққы жасадық. Хуситтердің премьер-министрі, оның министрлерінің басым бөлігі және өзге де жоғары лауазымды тұлғалар жойылып, жарақат алды» деп жазды ол. 

Еске салсақ, бұған дейін, 2025 жылғы 25 тамызда Израиль Сана қаласына әуе соққысын жасаған еді. Ол кезде кемінде 10 адам қаза тауып, шамамен 100 адам жараланған.

Хуситтер Палестина халқымен ынтымақтастық білдіріп, Израильге қарай үнемі зымырандар мен дрондар атқылап келеді. Сонымен қатар, олар Қызыл теңіз бен Аден шығанағындағы сауда кемелеріне шабуыл жасады. Бұған жауап ретінде Израиль мен АҚШ хуситтер бақылауындағы аумақтарға, оның ішінде Сана қаласына да соққы жасап отыр.

Хуситтер билікке 2014 жылы келіп, 2015 жылдан бастап Йемен астанасы Сана қаласын бақылауда ұстап отыр.

Ахмед әл-Рахави 2024 жылғы тамыз айынан бастап хуситтер үкіметін басқарған. Қазіргі таңда премьер-министр қызметіне оның орынбасары Мұхаммед Мифтах тағайындалды.

Биылғы мамыр айының басында Дональд Трамп хуситтер бұдан былай соғысқысы келмейтінін мәлімдеді деп,  бомбалауды тоқтату туралы шешімді қарсы топ Таяу Шығыстағы маңызды кеме жолдарын үзбеуге келіскеннен кейін қабылданғанын айтқан болатын. 

Дегенмен  мамыр айының соңында БҰҰ бас хатшысы АҚШ-тың Иранның ядролық нысандарына соққысын қауіпті өршіту деп атады, ал Иран режимі уранды байытуды тоқтатпайтынын мәлімдеп, Израильге оқ жаудыруды жалғастырды.