Қызылорда облысының әкімі Гүлшара Әбдіқалықова ОКҚ баспасөз конференциясында «Қазақстан тарихындағы облысты басқарған жалғыз әйел әкім болу қиын емес пе?» деген сұраққа жауап берді.

Бұл туралы Orda.kz. хабарлады.

Аймақ басшысы жоспарлар, жақсы мамандар тобы болса, мүмкін емес дүниенің жоқ екенін айтты.

— Қазір бізде ауыл шаруашылығы, балық шаруашылығы, индустрияландыру, әлеуметтік блок бойынша жол жоспарлары жасалып, қабылданды. 2030 жылға дейінгі бірқатар бағдарламалар, орта мерзімді бағдарламалар, бесжылдық бар. Айқын көзқарас бар, кәсіпқойлар тобы бар.

Менің ойымша, мүмкін емес ештеңе жоқ. Облыс логистика жағынан ыңғайлы, барлық аудан бойынан темір жол өтеді, Батыс Қытай – Батыс Еуропа жаңа автобаны өтеді, Сырдария бар. Ең бастысы — белгіленген жоспарлар бойынша нақты жұмыс істеу,- дейді Қызылорда облысының әкімі.

Оның айтуынша, өткен жылы өңірде көптеген бағыттар бойынша көрсеткіштер нашар болған.

— Алты көрсеткіш бойынша біз минуста болдық – 100 пайыздан төмен. Биыл өсім байқалады. Бір көрсеткіш 100 пайызға орындалмай жатыр, ол мұнай өндіру, мұнда да жоспар бар. Біртіндеп 77 жаңа ұңғыма пайда болады, – деп атап өтті Гүлшара Әбдіқалықова.

Гүлшара Әбдіқалықова Қызылорда облысының әкімі болып 2020 жылдың наурыз айында өңірдің бұрынғы әкімі Қуанышбек Ысқақовты аса ірі көлемде алаяқтық жасады деген күдікпен қамауға алғаннан кейін тағайындалды. Бұған дейін ол мәжіліс депутаты болған.

Бөлісіңіз: