Экс-президент Нұрсұлтан Назарбаевтың кеңсесін қаржыландыру тоқтатылмайды - министрлік жауабы

Премьер-министрдің орынбасары - қаржы министрі Ерулан Жамаубаев «Қазақстанның тұңғыш президенті – Елбасы туралы» конституциялық заңның күші жойылған жағдайда оның кеңсесін қаржыландыру тоқтатыла ма, жоқ па деген сауалға жауап берді.

Жамаубаевтың айтуынша, «Қазақстанның тұңғыш президенті – Елбасы туралы» конституциялық заңнан бөлек «Президент туралы» конституциялық заң бар. Онда бұрынғы президенттерді қаржыландыру мәселесі қарастырылған.

«Бірнеше конституциялық заң бар ғой. Жалпы, «президент» және «бұрынғы президент» деген бар. Олардың барлығы мемлекеттік бюджеттен қаржыландырылады. Бұл тек Қазақстанның тәжірибесі ғана емес, дүниежүзінде солай – президент кезінде оның жұмысын қамтамасыз етуге қаражат бөледі, сосын президенттіктен кетеді ғой, экс-президент болған кезде жүріп-тұруына қаржы қарастырылады» деді министр.

Оның айтуынша, экс-президентке қатысты заңнамаға өзгеріс енгізілсе, қаражат бөліну тоқтайды. Ал қазіргі конституциялық заңдағы өзгерістер оған әсер етпейді.

«Егер «экс-президенттер мемлекеттік бюджеттен қаржыландырылмайды» десе, онда, әрине, алып тастаймыз. Бірақ қазір ондай сұрақ туындап тұрған жоқ» деп жауап берді Ерулан Жамаубаев.

Еске салсақ, Ашық НҚА порталында 2022 – 2024 жылдарға арналған республикалық бюджет туралы заңға өзгерістер мен толықтырулар енгізілген. Оған сәйкес, Қазақстанның тұңғыш президенті – Елбасының қызметін қамтамасыз етуге 1,2 млрд, ал Тұңғыш Президент кітапханасына 1,3 млрд теңге бөлу қарастырылған.