Экс-министрмен байланысы бар атышулы компаниядан миллиардтан астам қаржы өндірілді

Астана қаласының мамандандырылған ауданаралық экономикалық соты қорғаныс министрлігінің «К-Дорстрой» АҚ-на 1 миллиард 36 миллион теңге аванс пен 31 миллион теңге айыппұлды қайтару туралы талап арызын қанағаттандырды.

«К-Дорстрой» АҚ Алматы облысындағы «Жетіген»  аэродромын күрделі жөндеуден өткізу туралы келісім-шарт талаптарын орындамаған. Нәтижесінде, бас әскери прокуратураның араласуынан кейін кәсіпорын мемлекетке 1 миллиард 67 миллион теңге қайтарды.

77,9% үлесі бар «К-Дорстрой» компаниясының негізгі құрылтайшысы, қаржы экс-министрі Зейнолла Кәкімжанов болған. Қазір ол тек «Tyn Systems» компаниясымен байланысы бар.

Компания көптен бері қиындықтарға тап болды: 2023 жылы «Жетіген» аэродромына қатысты мәселелер мен жалақы қарызы салдарынан мүлкін сатып жіберді. 2024 жылы Астана әуежайындағы ұшу-қону жолағын жөндеуде кешігулер болды.