Экс-министрдің жерлеу кортежі талдықорғандықтардың ызасын туғызды

16 наурыз күні Талдықорған – Үштөбе тасжолымен келе жатқан көлік жүргізушілері ұзақ кептелісте қалып, наразы болды. Суық ауа райына қарамастан, арнайы техникалар жолды сумен жуып, коммуналдық қызметтер зиратқа апаратын жолды ретке келтірді. Orda.kz тілшісі мұның себебін анықтады.

Белгілі болғандай, жолды жаппай тазалау қаржы экс-министрі, қазіргі Ұлттық банк төрағасының орынбасары Ерұлан Жамаубаевтың әкесінің қазасына байланысты жүргізілген. Әкімдік зиратқа апаратын жолды жөндеуге бұйрық берген.

Тұрғындардың айтуынша, жолды жуудан бөлек, зират маңына бірнеше коммуналдық техника жеткізіліп, қиыршық тас төселген, жол тегістелген. Алайда жерлеу рәсімі кезінде тасжолдағы қозғалыс толығымен тоқтатылған. Жол полициясы көліктерді тоқтатып, жүргізушілерге бір сағаттан астам уақыт күтуге тура келген.

Жетісу облысының полиция департаменті тасжолдағы кептеліске байланысты түсініктеме берді.

«16 наурыз күні сағат 14:00 шамасында Талдықорған қаласына қарасты Еңбек ауылы маңындағы зиратта жерлеу рәсімі өтті. Оған 2000-нан астам адам қатысты, олар 500-ден астам көлікпен келген. Көліктердің көптігіне байланысты жолда кептеліс пайда болды. Жол-көлік оқиғаларының алдын алу және азаматтардың қауіпсіздігін қамтамасыз ету мақсатында тасжолға жол қозғалысын реттеуші полиция қызметкерлері қойылды», деп жазылған хабарламада.