Экс-министр Бишімбаевқа қатысты қылмыстық іс «Адам өлтіру» бабы бойынша тергеледі

Бұрынғы Ұлттық экономика министрі Қуандық Бишімбаевқа қатысты қылмыстық іс «Адам өлтіру» бабы бойынша тергеледі.

«Астанадағы мейрамханалардың бірінде әйелдің өліміне қатысты оқиғаны елордалық полиция департаменті ҚР Қылмыстық кодексінің 99-бабы 1-бөлігі (кісі өлтіру) бойынша тергеп жатыр» деп хабарлады Астана қалалық полиция департаментінің баспасөз қызметі.

Естеріңізге сала кетейік, 9 қараша күні кешке әлеуметтік желіде экс-министр Қуандық Бишімбаевтың әйелі Салтанат Нүкенованы ұрып өлтіргені туралы хабарлама тараған болатын. Бишімбаев ұсталғанға дейін өзін пышақтаймын деп қорқытқан. Кейін полиция атышулы іске қатысты сотқа дейінгі тергеу басталғанын хабарлады.

10 қарашада Ішкі істер министрлігі Бишімбаевтың әйелін ұрып өлтіргені үшін ұсталғанын растады. Кейін Шымкент соты резонанс аясында шартты түрде мерзімінен бұрын бостандыққа шыққан Бишімбаевтың жаза мерзімі аяқталғанын хабарлады.